2010-cu ildə “Synergy Group” Azərbaycanın ilk özəl ali təhsil müəssisələrindən olan Azərbaycan Universitetinin inkişafı üçün böyük həcmli investiya yatırmağa qərar vermişdir.

Azərbaycan Universitetində dörd fakültə, doqquz kafedra və 250 müəllimdən ibarət heyət fəaliyyət göstərir. 2006-cı ildən etibatrən universitetdə Bolonya prosesi tətbiq edilir. Universitetdə 19 ixtisas üzrə 1600-dən artıq tələbə təhsil alır. Eyni zamanda, burada Ph.D proqramı üzrə təhsil təklif olunur. Azərbaycan Universiteti bir sıra beynəlxalq universitetlərlə aktiv əməkdaşlıq edir, beynəlxalq təhsil mübadiləsi proqramlarında iştirak edir. Azərbaycan Universitetinin ABŞ-ın Corciya Dövlət Universiteti ilə qurduğu əməkdaşlıq nəticəsində Biznes Adminsitrasiyası üzrə bakalavr və magistr proqramları həyata keçirilir. Həmçinin, Lund Universiteti (İsveç) ilə aparılan əməkdaşlıq nəticəsində universitet Sosial İş proqramını da həyata keçirir. Tələbələr həmçinin İsveçdə pulsuz təhsil almaq imkanına da malikdirlər.

Qeyd etmək lazımdır ki, 2013-cü ildə Azərbaycan Universiteti nəzdində “Azərbaycan İntellektual Klubu” İctimai Birliyi yaradılmışdır. Təşkilatın məqsədi tələbələrin intellektual inkişafı istiqamətində yeni imkanlar yaratmaqdır. Hazırda “Azərbaycan İntellektual Klubu” İctimai Birliyi gənclər arasında ən popular intellektual oyun olan “Parlaq Zəka” verilişini təqdim edir.

“Davamlı gələcəyə doğru” şüarına sadiq qalan “Synergy Group” inanır ki, təhsilə qoyulan investisiya ölkəmizin gələcəyinə verə biləcəyimiz ən yaxşı töhfədir.

Universitet haqqında əlavə məlumat üçün www.au.edu.az veb səhifəsinə müraciət edə bilərsiniz.